Mbunge wa CUF afariki dunia Tanzania

Mbunge wa Chama Cha Wananchi (CUF) nchini Tanzania wa Jimbo la Chambani, Salim Hemed Khamis amefariki dunia. Mbunge huyo alianguka jana ghafla akiwa katika kikao cha kamati ya mambo ya nje na ushirikiano wa kimataifa katika ofisi ndogo za bunge jijini Dar es salaam wakati kamati hiyo ikiendelea na kikao chake. Mbunge huyo wa CUF ambaye siku za hivi karibuni alielekea nje ya nchi kwa matibabu ya afya yake alifikwa na hali hiyo na kubebwa na baadhi ya wabunge kwa kushirikiana na baadhi ya waandishi wa habari na kutolewa nje ya chumba cha mkutano na kupelekwa hospitali ya taifa ya Mhimbili ambapo alilazwa katika chumba cha wagonjwa wanaohitaji uangalizi wa karibu (ICU), kwa uchunguzi na matibabu zaidi. Habari zaidi zinasema kuwa, baada ya marehemu kuanguka, Wajumbe wa kamati hiyo wakiongozwa na Mwenyekiti wake, Edward Lowassa na Makamu Mwenyekiti, Mussa Hassan Zungu na baadhi ya wajumbe walimtoa nje ya ukumbi na kumpepea kwa kutumia magazeti na majarida. Hata hivyo, hali yake ilizidi kuwa mbaya huku akizungumza kwa tabu na kusema kuwa alikunywa dawa za shinikizo la damu (BP) kabla hajala chochote na hivyo kuzidiwa. Baadhi ya wabunge walisema kuwa Khamis akiwa amekaa, ghafla alianza kutapika huku akilalamika kuwa hajisikii vizuri baada ya kunywa dawa hizo na hali yake kubadilika.